趣事 + 辛酸史

今日係悠長假期嘅第一日, 我會休息一至兩日, 其餘日子都好忙, 又要做功課, 又要溫書, 無錯, 放完假之後, 又要交一大堆功課, 同埋要測驗.

之前果半個月, 真係忙透了. 有D野想寫喺Blog度同大家分享, 但都無咩時間寫. 而家就將我記得嘅趣事, 辛酸史寫落黎先......

30/03/2007 星期五
今日放左工, 由沙田撘火車到紅磡上堂, 諗住喺撘火車途中打一陣機 (打緊NDS Lite), 點知打打下, 抬頭一望車廂外, 發覺自己之前miss左落車, 原來當我打機果陣, 不知不覺間巳經去左尖東了^_^. 之後好無奈, 唯有撘返轉頭. 好彩我早左喺公司走, 否則我便會遲到了!!!

31/03/2007 星期六
今晚諗住喺公司做功課做到十點左右, 但係今晚八點半播放新一輯嘅殘酷一叮, 所以7點幾由公司離開, 返屋企收睇我嘅殘酷一叮. 新一輯嘅殘酷一叮依然咁好睇, d參賽者好攪笑, 尤其係好似肥姐個位參賽者同森美個幕, 超攪笑, 覺得森美俾人玩多D囉!!!當我睇到好像梁洛施 (Isabella)嘅參賽者出場表演時, 我睇到好HIGH, 皆因佢一邊玩三個呼拉圈, 一邊唱歌. 樣又甜, 唱歌又掂, 抵佢做今集嘅台主.

01/04/2007 星期日
今晚要開夜做份Lab report!!!!!!!!!!

02/04/2007 星期一
尋晚仲未做晒份Lab report, 今晚又要開通宵做埋佢. 做到五點幾, 太眼瞓啦, 終於忍唔住瞓左覺.

03/04/2007 星期二
今日返工, 精神狀態非常差, 為左份Lab report, 呢幾晚無覺好瞓. 為了恢復狀態, 沖左好多半咖啡飲 (至少五坏), 提提神. 今晚要上堂, 但份Lab report今晚就要交啦, 仲未做晒tim. 唯有今晚走堂做埋佢. 做到十一點半, 終於做晒啦, 之後就交左去Assignment Box度. 雖然份功課做得唔係咁好, 但勝在盡力而為, 好過無交啦, 你地話係唔係先.

04/04/2007 星期三
今日發出左寒冷天氣警告, 好鬼凍, 想凍死人咩.......今朝返到公司見到個女同事著左條短褲. 我真係唔明女人諗緊D咩, 係唔係天氣唔凍, 就唔著短褲呢?? 對所有女士們忠言一句: 貪靚之餘, 都要小心身體!!
今日返工無咩mood做野添, 可能之前做功課做到人都緊張, 想輕鬆下, 或者返埋今日就放假呢.
今日報左名, 參加左公司攪嘅保齡球比賽, 四月廿一日喺奧海城舉行. 記得上年都有參加, 希望今年嘅成績會好過上年啦, 哈哈...........
今晚同班friend落左bar飲酒, 順便睇埋歐冠盃八強第一回合: 羅馬 vs 曼聯. 雖然曼聯作客1:2輸左俾羅馬, 但因作客入左一粒, 只要下一場喺主場1:0贏左就可以出線啦!